AMIR TEMUR SULOLASI

Jahonshumul fotihlar, ulugʻ sulola va saltanatga asos solgan hukmdorlar shaxsiyati, oilaviy madaniyati, farzandlari, nabiralari, kelinlari, qarindosh-urugʻlari, quda-andalari, xullas, turmush tarzi, hayot yoʻli hamisha ulkan qiziqishlar boisi boʻlib keladi. Sohibqiron Amir Temur va uning Markaziy Osiyo, Xuroson, Eron va Hindistonda besh asrga yaqin hukm surgan sulolasi benazir katta xonadonni tashkil etadi. Shajaraning bardavomligi bevosita davlat ahamiyatiga molik boʻlgan oilaviy tarbiyaga bogʻliqligi, oʻzlikni, shaʼnni, or-nomusni saqlash xalqimizda uzoq asrlar davomida sayqal topgan milliy mentalitet, urf-odatlar, udumlar bagʻrida yetilganligi, ravnaq topganligi Sohibqiron tamal toshini qoʻygan toj-u taxt vorislari hayot yoʻli misolida keng koʻlamda tadqiq etildi. Mavjud tadqiqotlarda doimo siyosat talqini soyasida qolib kelgan Amir Temur va Temuriylar oilasi, ularning feʼl-atvori, tabiati, shijoati, sifatlari, surat va siyratlari, boshqaruv qobiliyatlari, ayricha fazilatlari, qusur va zaif jihatlari tarixiy manbalar vositasida oldingi marrada yoritildi, inkishof etildi. Asar shu jihati bilan eʼtiborga loyiqdir.