BEVALAR

Zulxumor Soliyevaning qoʻlingizdagi ilk kitobiga kiritilgan pyesalarining deyarli barchasi poytaxt va viloyat teatrlari sahnalarida qoʻyilib, tomoshabinlar eʼtiboriga havola etilgan. Muallif tomonidan tarixiy “Jahon otin – Uvaysiy” dramasida oʻtmishga teran nazar solinib, shoira qalbining nozik tuygʻularga boyligi koʻrsatiladi. Uvaysiyning charxi kajraftorning ishqlaridan hasratu alamlarga toʻlgan yurak nolalari bayon etiladi. Boylik, martaba deb nafs domiga tushgan kimsalar zamona kulfati ekanligidan kuyib, figʻon chekkan Uvaysiyning qalb iztiroblari qalamga olinadi. Muallifning zamonaviy asarlarida esa bugungi kun odamlarining yurt ravnaqi, el farovonligi yoʻlida olib borayotgan fidokorona mehnatlari, vatanparvarlik, muhabbat, mehru oqibat va odamiylik mavzulari tarannum etiladi. Komediyalarida esa inson boshiga tushadigan turli hayotiy voqealar hajv tilida mohirona aks ettiriladi.