DAVLAT TILIDA ISH YURITISH

Respublikamiz ijtimoiy hayoti va xalq xoʻjaligining barcha sohalarida davlat tilida jahon oʻlchovlariga mos tarzda ish yurita olish, milliy-maʼnaviy qadriyatlarni puxta egallash, oʻz fikrini yozma shaklda toʻgʻri ifodalay bilish kabi talablar barkamol mutaxassislar tayyorlashning muhim shartidir. Shu maqsadda amaldagi oʻquv dasturlari asosida akademik litseylar talabalari uchun ilk marotaba «Davlat tilida ish yuritish» darsligi yaratildi. Oʻzbekiston Respublikasining «Davlat tili haqida»gi qonuni oʻzbek tilining siyosiy-ijtimoiy maqomini taʼminladi va uning rivojlanishi uchun keng imkoniyatlar yaratdi. Xususan, ushbu qonunning 8, 9, 10- moddalarida hujjatlarning davlat tilida tayyorlanishi, boshqaruv organlari, muassasa, korxona va tashkilotlarda ish davlat tilida yuritilishi taʼkidlangan. Shu maqsadda taʼlim muassasalarida oʻquvchi va talabalarning oʻzbek tilini milliy-maʼnaviy qadriyatlari sifatida puxta egallashi, oʻz fikrini yozma shaklda toʻgʻri ifodalay olishi, nutqiy savodxonlikni oshirish, hujjat matnlarini tuzish koʻnikmalarini shakllantiriladi. Jumladan, akademik litseylarda «Davlat tilida ish yuritish» darslari joriy etildi. Bu fandan namunaviy oʻquv dasturi tuzildi va shu asosda «Davlat tilida ish yuritish» darsligi yaratildi. Darslikning mazkur kengaytirilgan nashri bu fanni oʻqitish jarayonida toʻplangan tajribalar, oʻqituvchilarning taklif-mulohazalari nuqtai nazari dan qayta ishlangan hamda toʻldirilgan. Darslikning asosiy qismi va ilovasida berilgan taʼlimiy oʻquv materiallari mazmuni oʻquvchilarning nutqiy savodxonligini oshirishga, yozma nutqini rasmiy-idoraviy uslub meʼyorlari asosida toʻgʻri shakllantirishga, hujjatlilik – munosabat ishini puxta egallashlariga qaratilgan. Ushbu maqsadga adabiy til meʼyorlari, matn qurilishi, hujjat turlari va ularning tarkibiy qismlari, toʻgʻri