IKKI KARRA IKKI – BESH

XX asr ikkinchi yarmi oʻzbek adabiyoti, aniqrogʻi, nasri rivojida Oʻtkir Hoshimovning munosib oʻrni bor. Mustabid tuzum sharoitida adib oʻzining haq soʻzi bilan el orasida eʼtibor qozondi. Yozuvchi oʻz asarlarida hamisha haq gapni aytishga intildi. Shu bois ham ijodkorning hikoya, pyesa, romanlari xalqimizning sevimli asarlari qatoridan oʻrin oldi. Oʻtkir Hoshimovning yana bir xislati, adib hech qachon yolgʻon gap aytmagan, mustabid mafkura, siyosat nogʻorasiga oʻynab vijdonini sotmagan, murosasozlik yoʻliga kirmagan. U oʻtkinchi mayllarga berilmay, soʻz sanʼatining azaliy muammosi – shaxs jumboʻi, ijtimoiy adolat tuygʻusi bilan qiziqdi. Adabiyot dunyosida „nasrdagi tarona“, „nasrdagi shoir“ atamalari bor. Yangi oʻzbek adabiyotida Abdulla Qodiriy bilan Said Ahmad haqli ravishda prozaning shoiri deb nom olganlar. Zamonaviy oʻzbek adabiyotida Oʻtkir Hoshimovni ham nasrdagi shoir, yetuk asarlarini esa nasrdagi qoʻshiq, tarona deb atash mumkin. Nashriyotimiz Oʻzbekiston xalq yozuvchisi, Davlat mukofoti sovrindori, „Buyuk xizmatlari uchun“ ordeni sohibi Oʻtkir Hoshimovning roman va qissalari, hikoyalari, dramalari, adabiy oʻylari hamda maqolalarini chop etishni rejalashtirgan. Isteʼdodli yozuvchi, xalqimiz mehrini qozongan adib Oʻtkir Hoshimovning asarlari kitobsevar xalqimiz uchun munosib sovgʻa boʻlishiga ishonamiz.