Jimjit jolalar

Odam ham o‘zini yo‘qotib qo‘yarkan. Tag‘in, ko‘rib, bilib turib-a. Yo‘qlikka tushsang yo‘qolasan, deyishguvchi edi. Turakulning tirikchilik ko‘chalarida o‘zini o‘zi unutib qoldirishi, borligini bildirishdek imiljirik urinishlari, jizg‘anak to‘lg‘onishlari, talpinishlari... Borlik va yo‘qlik oralig‘i... Yashadi, degani nimadir o‘zi?! Hayot, tiriklik, o‘tkinchi umr xususidagi o‘ylar, kechinmalar, kuzatishlar. Yana, ko‘ngilga naqshlangan ota o‘gitlariyu ona hikmatlaridan vujudga kelgan dilbitiklar. Bularning barini inson va hayot sinoatlarini anglash, bilish va tushunishga chog‘langan hissiy-intellektual mayl bamisoli bir mehvar yanglig‘ birlashtirib turadi. Fikrchan kechinmalar kitobxonlar qalbiga yo‘l topadi, ularni befarq qoldirmaydi.