KIL USTIDAGI QISMAT

Qoʻlingizdagi ushbu asar muallifi, yetuk sharqshunos, dovyurak razvedkachi, polkovnik Turdali Masutov uzoq yillar davomida Davlat xavfsizligi idoralarida xizmat qildi. Oʻta nozik va murakkab, qaltis hayot yoʻlini bosib oʻtdi. U kishi zimmasiga yuklatilgan masʼul vazifa taqozosiga koʻra yer yuzining eng olovli nuqtalaridan biri sanalmish Afgʻoniston mamlakatida uzoq muddat faoliyat olib bordi. Bu yurtning tarixi, tabiati, shu tuproqda istiqomat qiluvchi xalqning turmush tarzi, urf-odatlari Turdali Masutovda chuqur taassurot qoldirdi, koʻngliga bitmas-tuganmas hayrat-zavq-shavq soldi, shu barobarida, Afgʻoniston zaminida koʻp yillardan buyon davom etayotgan birodarkushlik urushi oqibatlaridan qalbi iztirobga toʻldi. Turdali Masutov qalamiga mansub “Kil ustidagi qismat” asarida xuddi shu kechinmalar, his- tuygʻular aks etgan. Mazkur asar katta qiziqish, zavq-shavq bilan oʻqiladi. Kitobxon yuragida qon-qardosh, jafokash afgʻon xalqiga nisbatan xayrixohlik, urushga, zoʻravonlikka nafrat uygʻotadi.