KUNDUZGI CHIROQ

Xalqimizga oʻzining “Yurakka sigʻmagan gaplar”, “Osmon beshigi”, “Ishq bogʻi”, “Yillar va yoʻllar” singari bir nechta sheʼriy hamda publitsistik kitoblari bilan yaxshi tanish shoir va publitsist Abdurasul Jumaqul (Jumaqulov) bugungi davrga hamohang zaylda tayyorlagan navbatdagi publitsistik maqolalar, suhbat va adabiy oʻylar hamda kichik voqeiy hikoya va esselar kitobini “Kunduzgi chiroq” deb nomlabdi. Bu neni anglatadi? Kishilik tarixidan maʼlumki, barcha davrlarda ham jamiyat yaxshilarga ehtiyoj sezgan; yaxshilar boiski, yorugʻ dunyo chiroyi, faraxbaxsh, istiqomatga qulay. Muallif dunyoga mashhur donishmandlardan birining mashhur hikmatiga hamohang, kerak boʻlsa, yaxshilarni “kunduz kuni chiroq tutib axtarmoq joiz” shaklidagi gʻoyani taʼkidlaydi. Zotan, davlatimiz rahbari yurtimizda Uchinchi Renessans poydevorini qurishdek ezgu vazifani taqdim qilayotgan bugungi zamonda noyob insonlarga qaratilgan yorugʻ istaklar roʻyobi har qachongidan-da muhim va dolzarbdir. Betakror uslub negizida yaratilgan ushbu salmoqli kitob Sizga, albatta, manzur boʻlishiga shubha yoʻq.