MARTIN IDEN

U kitoblarni oʻqigan sari ilmga boʻlgan ishtiyoqi ham orta bordi. Buning ustiga, u nimadan boshlash zarurligini bilmas, shu bilan birga, tayyorgarlikning yoʻqligi unga koʻp xalal berardi, u har qanday kitobxon xabardor boʻlgan eng oddiy narsalarni ham bilmasdi. Martin gʻoyat zoʻr ishtiyoq bilan sheʼr oʻqishga kirishgan, lekin bu sohada ham koʻp narsani bilmasdi. U Suinbernning Ruf bergan kichik bir toʻplamidagi sheʼrlarini oʻqish bilan cheklanib qolmadi. U shoirning «Dolores»ini ham oʻqib chiqdi va uni mukammal tushundi. Ruf bu asarni tushunmagan boʻlsa kerak, degan qarorga keldi u. Bunday nozik, yengil hayot kechiruvchi qiz uni qanday ham tushunsin?