Mening koʻnglim bir qushdir

Xoja Ahmad Yassaviy shaxsi bilan yaqindan tanishish, uning taʼlimoti haqida bilishni istaganlar uchun ushbu asar taʼsirchan manbadir. Asarni mutolaa qilar ekansiz, sabr, kamtarlik, pushaymonlik, ruhiy kamolotga yetishish kabi tushunchalarni chuqurroq anglay borasiz. Turkiy davlatlar yetakchilari va turkiy qabilalarning Xoja Ahmad Yassaviy shaxsiga hurmati, munosabati, ushbu donishmand shaxsning turkiy tilli xalqlar ichida islomni yoyish borasidagi hissasi kabi tarixiy masalalar yoritilgan ushbu asar oxirgi sahifasiga qadar sizni hayajonga soladi. Oʻrta Osiyoning jugʻrofiy tasviri oʻquvchini ana shu zamonga bevosita sayohatga eltadi, oʻsha davr muhitiga singdiradi. Darhaqiqat, Xoja Ahmad Yassaviyning bagʻrikenglik va mehr-muhabbat ila oʻz zimmasiga olgan vazifalari umuminsoniylikka daʼvatdir.