NAVOIY – 30

Azim poytaxt Toshkentning qoq markazida joylashgan Navoiy koʻchasidagi engboshiga «30» raqami zarb etilgan bu muhtasham imorat ushbu kitob qahramonidir. Ehtimol, siz, hech zamonba bino ham badiiy asar qahramoni boʻlishi mumkinmi, deb soʻrarsiz. Lekin Sanʼat nomli oqsoch momo qalʼalar va qoʻrgʻonlar, saroy va qasrlar, masjidu madrasalar, butxonayu kalisolar haqida otashin harorat va mahorat bilan bitilgan qanchadan-qancha goʻzal asarlarga doya boʻlgani tarixdan yaxshi maʼlum. Loaqal «Bibi Maryam ibodatxonasi», «Saddi Iskandariy», «If qalʼasining mahbusi», «Arbat bolalari», «Daryo boʻyidagi uy» kabi asarlarni eslash kifoya. Shu maʼnoda, Navoiy – 30 oʻz siymosida ham qalʼa, ham qoʻrgʻon, ham saroy, ham qasri oliyga xos jamiki belgi-alomatlarni mujassam etgani uchun, hech shubhasiz, badiiy asarning toʻlaqonli qahramoni boʻlishga mutlaqo munosibdir. Muallif va nashriyot kitobda uchrashi mumkin boʻlgan ayrim oʻxshash holatlar tasodif ekanini qayd etadi.