Ota

Odatda biror kitobga annotatsiya yozar ekanmiz, yozuvchining mahoratiyu asarning tarbiyaviy ahamiyati haqida toʻxtalamiz. Bu gal yondashuvni oʻzgartirib, savol bilan boshlaymiz. Xoʻsh, oʻquvchi nega qimmatli vaqtini sarflab, ushbu kitobni mutolaa qilishi kerak? Bizningcha... Birinchi sabab – yozuvchining mashhurligi, muallifning bundan avvalgi kitoblari nafaqat oʻquvchilar, balki adabiy tanqidchilar tomonidan ham juda iliq kutib olingan, tili, uslubi, zamon va makon tushunchalari oʻquvchini, soʻzsiz, «asir oladi». Ikkinchi sabab – mavzuning originalligi. Ijtimoiy yengil-yelpilikdan uzoqligi asar nomidan ham bilinib turibdi. «Ota» «barcha otalarga bagʻishlanadi». Demak, otalik hissi, otalik burchi, otalik hukmi, otalik soʻzi... Uchinchi sabab – romanning hajmi. Asar katta emas, ammo voqealar bir inson umriga teng. Dastlab urush uchogʻida tiriklik uchun kurash tasvirlansa, nihoyada osuda osmon ostida omonatni topshirishga tayyorlik manzarasi yuz ochadi. Tugʻilish va oʻlim – bu oraliqda inson emas, ota – kim? Mutolaadan keyin mehribon, jonkuyar, ammo gunohkor ota haqidagi ushbu romanni yaqinlaringizga tavsiya etar ekansiz, toʻrtinchi sabab, sizda, albatta, boʻladi.