Ota izidan

Farzand – otaning izdoshi, farzand – otaning gʻururi, farzand – otaning suyanchi. Bu koʻpchilik biladigan oddiy haqiqat. Odil Yoqubov asari qahramoni boʻlgan Shukurjon ham otasiga shunday sadoqat bilan ulgʻaygan ziyoli yigit. U bosmachilar bilan jangda halok boʻlgan otasining diydorini koʻrmagan, otasining bagʻrida orom olmagan, otasining erkalashlaridan bahramand boʻlmagan. Bunday goʻzal va eng shirin tuygʻularga qalbi tashna boʻlib voyaga yetgan. Afsuski, ona koʻkragini har tun qoʻmsaydigan goʻdak bu mehrdan ham mosuvo boʻlib, ona tomonidan buvisi qoʻlida tarbiya topadi. Buvisi Shukurjonni ota-onasiga mehr tuygʻusi bilan voyaga yetkazadi, unga har oqshom uyqu oldidan otasining qahramonligi haqida goʻzal hikoyalar soʻzlab beradi. Voyaga yetgan Shukurjon endi otasi ruhini shod qilish, uning pok nomini oqlashni oʻzining farzandlik burchi deb biladi, shunga ahd qiladi. Ammo bu yoʻlda uning oldida bir qancha toʻsiqlar paydo boʻladi. Yosh kitobxon doʻstim! Keling, asarni birgalikda oʻqiylik. Shukurjonga xayrixoh boʻlaylik.