O‘ZBEK XALQ ERTAKLARI

«Bor ekan-da yo‘q ekan, och ekan-da to‘q ekan...» degan sehrli jumlalarni eshitganimizda, darrov bolalik xotiralarimiz, kechalari bobo-buvilarimiz aytib bergan ertaklar yodimizga tushadi. Negaki, har birimizning ezgulik va mehr-oqibat, yaxshilik va yovuzlik haqidagi tushunchalarimiz oʻzbek millatining benazir maʼnaviy merosi – ertaklar orqali shakllangan. Oʻzbek xalqining paydo boʻlish tarixi qanchalik qadimiy boʻlsa, uning milliy anʼana va urf-odatlari, orzu-istaklari, qadriyatlari aks etgan ertaklari ham shunchalik uzoq tarixiy ildizga egadir. Ertaklar bola tarbiyasida nihoyatda ahamiyatli boʻlib, goʻyo ularda murgʻak qalbga taskin beruvchi, orzu-umidlar ushalishiga ruhiy kuch ato etuvchi allaqanday sehrli jodu yashiringanday. Ertaklardan olgan teran maʼnoli oʻgit va saboqlar bola ongida bir umrga muhrlanib, ular ulgʻaygandan keyin ham nihoyatda asqatadi. Bola ertaklar orqali hayotni mustaqil mushohada qilishni oʻrganadi va ertak oʻqigan bola oʻzi ham moʻjiza yaratishni, ezgulikka intilishni istab qoladi.