QIRQ KOKILLI KELINCHAK

Mazkur toʻplamdan joy olgan qissa va hikoyalar badiiy jihatdan pishiqligi, oʻqimishliligi, qahramonlar feʼl-atvoridagi oʻziga xoslik va rang-barang talqini bilan, keyingi yillar hikoyachiligini ham shaklan, ham mazmunan boyitgan asarlar sirasiga kiradi. Qissa va hikoyalarda bugungi kun qishloq hayoti nihoyatda tiniq va jonli lavhalarda tasvirlangan. Qishloq odamlarining orzu-oʻylarini, intilishlarini tasvirlash barobarida, dunyo madaniyatiga intilayotgan va beixtiyor, milliy zamindagi uzoqlashayotgan shaharliklardan farqi oʻlaroq, oʻzbekona urf-odatlarimizni, rasm-rusumlarimizni, oqibat, diyonat kabi qadriyatlarimizni koʻz qorachigʻiday saqlashga urinayotgan, yaxshilik va yomonlik tuygʻularini insof va adolat posangisida oʻlchaydigan, sodda, tanti, zamondoshlarimiz obrazini yaratgan. Ularning ichki dunyosi, kechinmalari, maʼnaviy olami bilan tanishar ekansiz, ajdodlarimizdan meros fazilatlar qoningizda jumbish urayotganini his qilasiz.