Samarqand osmonida yulduzlar

Jahon tarixida mustahkam iz qoldirgan shaxslar qatorida Amir Temur nomi alohida eʼtirof etiladi. Ulkan Temuriylar saltanati asoschisi Amir Temur va uning davlatni boshqarish, mamlakatlarni bosib olish uchun olib borgan janglari va uning butun dunyoni egallab olishga boʻlgan intilishi, bu maqsad yoʻlidagi xatti-harakati tarixchilar tomonidan turlicha talqin etilgan. Amir Temur shaxsiga qiziqqan ziyrak kitobxon uchun navbatda taqdim etilayotgan Sergey Borodinning yirik roman-trilogiyasida jahongirning olib borgan janglari bilan bir qatorda uning shaxsi, ichki olami haqida ham soʻz boradi. Aslida, sizu biz tarix kitoblarida oʻqiganimiz Amir Temur qanday shaxs boʻlgan? Uning butun dunyoni egallash istagi zamirida qanday maqsad yashirin, aslida? Nega Amir Temur saltanat ishlarini yuritishda hatto oʻz farzandlarini ham ayamagan? Temuriylar saltanatining mustahkam turishiga u qanchalik ishongan? Eʼtiboringizga havola etilayotgan roman-trilogiya aynan shu savollarga javob beradi.