TERGOVCHI

Qadr-qimmat, hurmat, oʻzaro mehr-oqibat tushunchalari, avvalo, ijtimoiy sogʻlom muhitda shakllanadi. Bu muhit sogʻlom boʻlmas ekan, qadr-qimmat toptaladi, odob-axloq meʼyorlariga putur yetadi, umuminoniy tuygʻular zavol topadi. Detektiv ixlosmandlarining sevimli yozuvchisiga aylangan Komil Sindarovning mazkur asari ayni mulohazalar xususida soʻzlaydi. Toʻgʻri, asar mutolaasini boshlar ekansiz, sirli qotillik yuz bergani, qotillarning izsiz gʻoyib boʻlgani, chigal vaziyatlaru kulminatsion nuqtalar va kutilmagan yechim kitobxon fikru xayolini band etadi, asarni bir nafasda oʻqib chiqishga xizmat qiladi. Ammo zukko kitobxon mutolaa soʻngida asar nima sababdan yozildi va qanday maqsadda oʻquvchiga yetkazildi, degan savol ustida biroz bosh qotiradi. Darvoqe, «Tergovchi» degan umumiy nom ostida nashrga tayyorlangan mazkur detektiv seriya yozuvchi ijodining oʻnta kitobini oʻz ichiga oladi.