TILLA UZUK

Odil Yuqubov, shubhasiz, XX asr jahon va oʻzbek adabiyotining yirik vakillaridan biri, inson qalbining kuychisi, taʼbir joiz boʻlsa, betakror isteʼdod sohibidir. Tarixiy mavzudagi yirik asarlari dunyoning bir necha tillariga tarjima qilingan, Chingiz Aytmatovdek daho ijodkorning eʼtirofiga sazovor boʻlgan adib asarlarini qalbda tugʻyonsiz, koʻzda yoshsiz, yana mutolaaga qayta ehtiyoj sezmasdan oʻqib boʻlmaydi. Yuqori sinfda tahsilni davom ettirayotgan kitobxon doʻstlarimiz ham adabiyot darsliklarida Odil Yoqubov asarlari bilan qisman tanishish imkoniga ega boʻlganlar va ishonch bilan aytamizki, adib asarlarini «qayerdan topib oʻqisam ekan?» deb bosh qotirganlar. Dilga yaqin, mehringizni qozonib ulgurgan adib ijodidan saralangan mazkur moʻjazgina kitobchamiz sizga bu borada yaqin koʻmakdosh boʻla oladi.