TUG‘DONA

Rivoyat qilishlaricha, togʻ qoʻynidagi yurtlarning biriga yov yurish qilganda xabarchilar barcha qishloq, ovul odamlarini xatardan ogoh etib, jangga chorlaydi. Odamlar shu atrofdagi togʻ-toshda, qoyalarda oʻsadigan daraxtdan kaltaklar va choʻqmorlar yasab, Vatan uchun hayot-mamot jangiga kirishadi. Hatto qariyalari-u bolalar ham qoʻllarida novdalarni bayroq kabi boshlari uzra baland koʻtarib, hayqirgancha jangchilarga madad berishadi. Birgalashib yovni butunlay magʻlub etgan el ogʻir kunlarida madad boʻlgan daraxtni eʼzozlab, tugʻdona – bayroq daraxt, deb ataydi. U daraxtlar ichida muqaddas, kamyob hisoblanadi, oʻzi juda qattiq, mustahkam, tikka oʻsadi. Sershox. Barglari arratish, qirrador. Mevasi shifobaxsh. Tugʻdona yogʻochidan yasalgan doʻmbira sadolari insonga beqiyos kuch-gʻayrat, shijoat, orom bagʻishlaydi. Azim Suyun ijodi shu tugʻdonaga qiyos qilgulikdir.