Umr — ipga terilgan marjon

Ayol... U tabiatning eng ko‘rkam yaralmishlaridan. Olloh unga tabiatdagi eng noyob va eng nodir jihatlarni singdirgan, o‘z navbatida ayolning betakror fazilatlaridan olam va hayot yanada nurafshon. To‘rt qismdan iborat mazkur to‘plamda o‘zbek ayollariga xos bo‘lgan andisha va nazokat, zebolik va zukkolik kabi xislatlar talqin qilingan. Shu bilan birga to‘plamdan muallifning elga tanilgan san’atkorlar va ijod ahli haqida yozgan ocherklari, suhbatlari hamda badiiy lavhalari, shuningdek, yon-atrofimizda sodir bo‘layotgan voqea va hodisalar, turmush chorrahalari murakkabliklarining yechimini topishda aql va idrok, iroda va matonat darkorligi badiiy ifodalangan hikoyalari o‘rin olgan. To‘plam yoshi ulug‘larga ham, yigit va qizlarga ham birdek manzur bo‘ladi degan umiddamiz.