Venetsiya missiyasi

«Agar yozuvchining kitoblari barqaror va yaxshi sotilayotgan boʻlsa, uning intervyu va soʻzboshi yozishga hojat yoʻq, tanqidchilar nima deyishidan xavotirlanishga ham sabab yoʻq», degan edi britaniyalik mashhur yozuvchi, detektiv asarlar ustasi Jeyms Hedli Cheyz. Darhaqiqat, u faoliyatida mazkur soʻzlariga mos ravishda harakat qildi. Harakatlari samarasi oʻlaroq yozuvchining koʻplab asarlari – klassik detektiv qissalari hamda sarguzasht romanlari dunyo yuzini koʻrdi va oʻquvchilar qalbidan joy oldi. Ayniqsa, uning 93ta detektiv romani koʻplab tillarga oʻgirildi va minglab tirajlarda sotildi. «Venetsiya missiyasi» – muallifning ana shunday koʻp va xoʻp sotilgan detektiv asarlaridan. Kitob mutolaasi davomida oʻquvchi qahramon bilan sarguzashtlarga boy mashaqqatli sayohatga otlanadi, dushmanlarga qarshi kurashishda uni qalban qoʻllab-quvvatlaydi, xatarli onlarda qaygʻuradi, kulgili sahnalarda koʻngil yozadi.