Abdulla qiziq nima deydi

Zamonaning teskariligini qarang! Kimdir butun umri davomida elning, ayniqsa mashhurlarning nazariga tusholmay oʻtadi. Abdulla qiziq Akbarovning hayoti va ijodi esa, buning aksi. Hali uncha tanilmay turib, oʻzining ichakuzdi hangomalari bilan butun Osiyoga dong taratgan Muhiddin qiziq Darveshovning nazariga tushdi. Uning ilk ijodi bilan tanishgan Muhiddin qiziq, «Oltiariqdan bir qiziqchi chiqibdi, Abdulla degan, ijodi — dahshat», deya eʼtirof etadi. Mana, chorak asrdan buyon Abdulla Akbarov oʻzining «dahshat»ligini yoʻqotmay, qiziqchilarimizning eng oldingi saflarida bormoqda. Buning sababi esa bitta: Abdulla Akbarov — jahon hajviyotining ustoz-yoʻl ustalari va xalq ogʻzaki ijodini tinimsiz oʻrganishdan charchamaydigan qiziqchi. Shuning uchun unda hamisha hangomalarning yangisidan boʻladi. Ushbu toʻplamga ana shu izchil oʻrganishlar natijasida yaratilgan, bugungi kunda ham yangiligini yoʻqotmagan hangomalar, sheʼrlar va xandalar jamlandi.