ABU RAYHON BERUNIY

Ushbu kitob soʻzboshisining muallifi, AQSHning Shimoliy Karolina universiteti professori, xalqaro Nobel mukofoti laureati Aziz Sanjar taʼkidlaganidek, “Abu Rayhon Beruniy yer yuzining diametrini bugungi oʻlchovlarga yaqin bir tarzda hisoblagan va geodeziya ilmiga asos solgan, trigonometriyaning astronomiyadan ajratilishi kerakligini ilgari surgan va trigonometrik funksiyalarni hisoblagan, Nyutondan avval yerning tortish kuchidan xabar bergan, Galileydan oldin yerning shar shaklida ekanligini aniqlagan, hayoti mobaynida geometriya, trigonometriya, geodeziya, mineralogiya, tibbiyot va tarixga oid 150 dan ortiq asar yozib qoldirgan buyuk turkiy mutafakkirdir”. Oʻzbekiston xalq yozuvchisi Isajon Sultonning ushbu romanida yurtimizning daho allomasi Abu Rayhon Beruniyning yorqin shaxsiyati, buyuk kashfiyotlarining yaratilishi tarixi bilan birga, oʻsha davrda Movarounnahr va Xurosonda yuz bergan voqealar, shuningdek, hukmdorlar Kobus ibn Vushmgir, xorazmshoh Maʼmun, sulton Mahmud Gʻaznaviy bilan munosabatlari haqida batafsil hikoya qilinadi.