ADOLAT MANZILI

Odil Yoqubov O‘zining ushbu romanida inson qadr-qimmati, or-nomusi, iymon-e’tiqodi har narsadan ustunligini e’tirof etadi. "Adolat manzili" romanida "o‘zbek ishi" yoki "paxta ishi" nomli ijtimoiy hodisaga aloqador voqealar qalamga olinsa-da, biroq adib faqat mana shu voqealarni yoki ularning dahshatli oqibatlarini jonlantirishnigina o‘z oldiga asosiy maqsad qilib qo‘ymagan. Uning bosh maqsadi mazkur voqealar asosida umuminsoniyatga xos davriy qadriyatlar haqida mushahada yuritish va kishilarning e’tiborini ularga jalb qilishdadir. O‘zining bu maqsadini yozuvchi quyidagicha tushuntiradi: "Men bu asarga qo‘l urar ekanman, faqat "paxta ishi" bahonasida respublikamizga kelib, mudhish yovuzliklarga yo‘l qo‘ygan qonunbuzarlarni fosh etishnigina o‘zimga maqsad qilib qo‘ygan emasman... Men bu mavzuga sal boshqacharoq maqsadda yondashishga urindim. Ya’ni bo‘hton va bo‘htonchilik inson va jamiyat uchun naqadar xatarli ekanini bir halol, pokiza, vafodor oila qismatida aks ettirishga harakat qildim".