Choʻl boʻrisi

Hermann Hesse (1877–1962) XX asr olmon adabiyotining yirik namoyandalaridan biri, adabiyot sohasidagi xalqaro Nobel mukofoti sovrindori. Uning koʻplab roman, qissa, hikoyalari, sheʼrlari, siyosiy va adabiy-tanqidiy ruhdagi asarlari chop etilgan. Ilk bor 1927-yilda bosilib chiqqan «Choʻl boʻrisi» romani Hermann Hessega olamshumul shuhrat keltirgan teran psixologik asardir. «Choʻl boʻrisi»da oʻz-oʻzini tahlil qilish va hal etilmagan maʼnaviy-ruhiy ziddiyatlarni yengish yoʻlidagi saʼy-harakatlar qalamga olinadi. Unda muallifning oldingi asarlarida oʻzmi-koʻpmi aks ettirilgan Ruhga murojaat etish uslubi oʻzining yakuniy hamda toʻlaqonli ifodasini topgan. Yozuvchi Tomas Mann ushbu roman haqida shunday deb yozgan edi: «Choʻl boʻrisi» eksperimental dadillikda «Uliss», «Faux Monnayeurs» singari asarlardan qolishmaydigan roman ekanligini aytib oʻtishga hojat bormikin? «Choʻl boʻrisi» menga anchadan buyon ilk bor haqiqiy kitob mutolaasi ne ekanini qaytadan oʻrgatgan asardir».