CHOʻQQIDA QOLGAN OVCHINING OHI ZORI

Mana aziz kitobxon, nihoyat siz sogʻingan va anchadan buyon orziqib kutayotgan kitob nashrdan chiqdi. Sogʻinchlar, intizor kutishlar bejizga emas. Qardosh qirgʻiz va qozoq adabiyotining ikki buyuk ustuni – Chingiz Aytmatov, Muxtor Shoxonovning suhbatlari asosida tartib berilgan mazkur asar oʻzini butun insoniyat taqdiriga daxldor deb bilgan oʻquvchi sogʻinchi uchun arzirlik tuhfa. Kitobda oʻtgan ajdodlar ruhiga hurmat, ular qoldirib ketgan maʼnaviy meros va qadriyatlar oldidagi masʼuliyat, kelajak avlod taqdiri, odamzodning tabiat neʼmatlariga munosabati, maʼnaviy komillik, til va millat uygʻunligi, Vatan qadri, muhabbatning inson taqdiridagi oʻrni masalalari koʻndalang qoʻyiladi. Oʻquvchi kitobni oʻqirkan, suhbatdoshlar qalbidagi ogʻriqni oʻzida ham his qiladi. Adabiyotga shunchaki kirib kelmagan, tili, dini va millatidan qatʼi nazar ODAMZOD taqdiri, kelajagi uchun qaygʻurgan, kelgusi avlod farzandlarini faqat va faqat baxtli koʻrmoqni istagan va istaklarini mazkur asar orqali ifodalagan Aytmatovdek, Shoxonovdek isteʼdod egalari bizni hamisha uygʻoq yurak, uygʻoq ruh bilan yashashga chorlaydi.