ERKIN VOHIDOVNING IMZOSI

Aziz kitobxon! Qoʻlingizdagi ushbu risolaning muallifi, aslida men emas, Oʻzbekiston Qahramoni, xalqimizning ardoqli shoiri Erkin Vohidov. Mutolaa yakunida bunga oʻzingiz ham amin boʻlasiz. Mening ishim - umrini Vatan saodati yoʻliga bagʻishlagan mutafakkir vatandoshimiz haqidagi hayotning bugungi shiddati yoki boshqa sabab bois, yoddan koʻtarila boshlagan haqiqatlarni adabiyot olamiga endi-endi qadam qoʻyayotgan yoshlarga eslatib qoʻyish, oʻzim koʻrgan, bevosita guvoh boʻlgan voqealar, eshittuliklar tafsilotlarini asli qanday boʻlgan boʻlsa, shunday holda ustozning jonli suhbatiga ilova qilishdan iborat boʻldi, xolos. Kitob Erkin Vohidovni yaqindan bilgan, fusunkor sheʼrlari, dilbar gʻazallaridan bahramand boʻlgan muxlislarning yangi-yangi ilovalari bilan boyib boradi, degan umiddaman.