ERTA QAYTGAN TURNALAR

«Turkiy dunyo Alisher Navoiydan qariyb 500 yil keyin adabiyot cho‘qqisiga Chingiz Aytmatovni olib chiqdi», – degan fikrni bugun biror bir adabiyot ixlosmani inkor etmaydi. Asarlari dunyoning 180 tiliga tarjima qilingan va turli millat vakillarini insonni ulug‘lashga chorlovchi qadriyatlar atrofida birlashtirgan yozuvchi ijodiga kitobxon xalqi qayta va qayta murojaat qilaveradi. E’tiboringizga havola etilayotgan navbatdagi kitobga biz adibning «Birinchi muallim», «Erta qaytgan turnalar», «Yuzma-yuz» qissalari hamda «Baydamtol sohillarida», «Oq yomg‘ir» hikoyalarini jamladik. Asarlardagi qahramonlar taqdiri bir-biridan chigal, bir-biridan ziddiyatli, ayni paytda kitobxon ularning hech qaysiga befarq qarolmaydi: xuddiki, Oltinoy ham, Duyshen ham, Sultonmurot ham, Saida ham bizning yonimizda yashayotgandek... Jahon kitobxonlarining e’tirofiga sazovor bo‘lgan asarlar mutolaasi qalbingizda yangi dunyolarni ochishiga ishonchimiz komil.