Garri Potter va Qaqnus ordeni

Yozgi taʼtilning dastlabki oyini sehrgarlar olamidan narida, magl qarindoshlari – Dursllarning uyida, qamoqda oʻtirganday dunyobexabar oʻtkazayotgan Garri bilan uning bezori xolavachchasi Dudliga kutilmaganda dementorlar hamla qiladi. Tabiiyki, Garri dementorga qarshi qoʻllaniladigan, sehr-joduning eng oliy darajasiga mansub afsunlar turkumiga kiradigan, Himoyachi afsunini qoʻllashga majbur boʻlib, oʻzi bilan dementor vʼrusidan toʻsiq vazifasini oʻtaydigan moddiy tusga ega Himoyachisini hosil qiladi. Biroq uning ushbu ishi 1875-yili qabul qilingan «Balogʻatga yetmaganlar orasida sehrgarlik faoliyatini oqilona cheklash toʻgʻrisidagi dekret»ning qoʻpol ravishda buzilishi sifatida tasniflanib, Sehrgarlik vazirligi tomonidan intizomiy jihatdan muhokama qilinadi va Dambldorning himoyasi hamda Dursllarning mushukboqar qoʻshnisi, endi aniqlanishicha, tabiatan shvax boʻlgan Arabella xonim Figgning guvohligi ila oqlanadi. Shuningdek, Garri yozgi taʼtilning qolgan qismini Londonning Pinhoniylik maydonida oʻtkazib, Voldemortga qarshi kurash olib boradigan, Yovuz Lordning rejalari hayotga tatbiq etilishi, dahshatli niyatlarining amalga oshishiga yoʻl qoʻymaslik choralarini koʻrib boradigan Qaqnus ordeni va uning faoliyati bilan tanishadi. Bu yil maktabga sehrgarlik vazirining katta oʻrinbosari Dolores Jeyn Ambrij yovuz kuchdan himoya fanining yangi oʻqituvchisi sifatida ish boshlaydi. Keyinchalik «Xogvarts»ning bosh inspektori etib tayinlangan ushbu baqa-ayol bilan Garrining oʻrtasida kechgan keskin munosabatlar, bolaning ichki koʻrishday kechgan tushlari, unda dam Yovuz Lordning iloni Nagayna, dam Voldemortning koʻzi ila turli hodisalarni kuzatib borishi, Dambldor armiyasiga asos solinib, Garrining ushbu yashirin jamiyatdagi faoliyati, Sehrgarlik vazirigining Sirli sehr boʻlimi tasarrufidagi Bashoratlar zalida shisha idishda saqlangan bashorat uchun kurash kabi hodisalar «Garri Potter» romanlari turkumining mazkur beshinchi qismida bayon etilgan.