HAYOT SABOQLARI

Uzoq yillar davomida ishlab chiqarish korxonalarida, ijtimoiy taʼminot tashkilotlarida va davlat idoralarida fidokorona mehnat qilgan, hozirgi kunda ham jamoat tashkilotlarida sidqidildan xizmat qilib kelayotgan jamoat faoli, mohir tashkilotchi, ijodkor, jonkuyar inson Serikboy Usenov ushbu kitobida oʻzining koʻrgan-kechirganlarini, oʻtgan davrning oʻzi bilan bogʻliq boʻlgan baʼzi bir jihatlarini esdalik sifatida bayon qilishi bilan birga, koʻnglidagi gaplarini, oʻy-mulohazalarini hamda yosh avlodga boʻlgan oʻgit-nasihatlarini havola qiladi. Oʻziga yaqin boʻlgan insonlarga nisbatan qarindoshlik, qardoshlik, doʻst-birodarlik munosabatlariga toʻxtalib, ularga dil soʻzlarini, samimiy tilaklarini bildiradi. Oʻz xalqining manfaati bilan milliy qadriyatlarini himoya qilib, tilini, urf-odatlarini, madaniyatini va maʼnaviyatini yuksaltirishga, qardosh oʻzbek va qozoq xalqlari orasidagi doʻstlik va hamkorlik munosabatlarini rivojlantirishga baholi qudrat oʻz hissasini qoʻshayotganligini ham bayon etadi. Shu bilan birga oʻzining 70 yillik hayoti davomida koʻrgan-bilganlari yosh avlod taʼlim-tarbiyasiga oid oʻgit-nasihatlari va oʻy-mulohazalari kitobdan oʻrin olgan. Hayot saboqlari asosida ezilgan mazkur kitobning mohiyati va ibratli jihatlari oʻquvchilarga maʼqul keladi, degan umiddamiz.