HIKMATLAR

Xalq maqollariday jaranglovchi sermazmun hikmatlari va ibratli rivoyatlari tufayli Hayot muallimi deb ulugʻlangan, «Boʻston» va «Guliston» kabi pandnoma asarlari asrlar davomida Sharq mamlakatlaridagi maktab va madrasalarda asosiy darsliklar qatorida oʻqitilgan buyuk soʻz sanʼatkori Shayx Muslihiddin Saʼdiy Sheroziy qalamiga mansub mazkur tafakkur durdonalari u qoldirgan boy adabiy meros ichidan tanlab olindi. Bu hikmatlar oʻz davrining barcha ilmlarini egallagan alloma, dunyo kezib, hayotni har tomonlama oʻrgangan jahongashta donishmand, Olam va Odam mohiyati ustida bir umr mushohada yuritgan mutafakkir, dunyoni mukammal, hayotni toʻkis, insonni barkamol koʻrishni orzu qilgan, bani bashar taqdiri uchun masʼul zotning rang-barang oʻy-fikrlari, teran falsafiy umumlashmalarini, purmaʼno hayotiy xulosalaridir. Shayx Saʼdiyning muhtasham hikmatxonasidan dastalangan ushbu toʻplam hikmatsevar xalqimizga munosib tuhfa boʻlishiga ishonamiz.