ICHAKUZDI VA DAHSHATLI HANGOMALAR

Qadrli oʻquvchi! Qoʻlingizdagi kitobdan joy olgan hangomalarning bir qismi vaqt va zamon tanlamaydigan yengil madaniy-maishiy mavzularga oid ichakuzdi hangomalar boʻlsa, qolgan qismi oʻtmishning kulguli, ayni paytda dahshatli hangomalari haqidagi satirik asarlardan iborat. Ularni diqqat bilan oʻqib chiqsangiz, ishonchimiz komilki, ham kulasiz, ham kuyasiz. Yengil, bezubor hangomalarni oʻqib beixtiyor kulib yuborasiz, hatto chin yurakdan qahqaha otasiz. Ammo sobiq shoʻrolar hukmronligi davriga oid siyosiy va maishiy hangomalarni oʻqiganingizda qalbingizda tabiiy ravishda qabohatga toʻla oʻtmishga nisbatan nafrat, istiqlol nurlariga oʻgirilgan hozirgi farovon zamonga nisbatan mehr-muhabbat tuygʻulari joʻsh uradi. Shu dorilamon kunlarda oʻtmishdagi dahshatli damlarni qanchalik eslasak bugungi shodona kunlarning qadriga shunchalik yetamiz, porloq hayotimizga shukronalar aytamiz. Farovon, tinch-osuda turmushimiz manbai boʻlgan buyuk istiqlolni ulugʻlaymiz, uni yanada mustahkamlash uchun kurashga bor imkoniyatlarimizni ishga solamiz.