Jannatga yoʻl

Abdulla Oripov 1941-yilning 21-martida Qashqadaryo viloyati, Koson tumani Nekoʻz qishlogʻida tugʻilgan. 1958-yilda oʻrta maktabni oltin medal bilan tamomlagach, Toshkent Davlat universiteti oʻzbek filologiyasi fakultetining jurnalistika yoʻnalishiga oʻqishga kirib, oliygohni ham 1963-yilda imtiyozli diplom bilan tugatadi. Universitetdan soʻng 1963–1967-yillarda „Yosh gvardiya“ nashriyotida muharrir, 1974–1976-yillarda „Sharq yulduzi“ jurnali boʻlim mudiri; 1976–1982-yillarda Oʻzbekiston Yozuvchilar uyushmasi adabiy maslahatchisi; 1982–1983-yillarda uyushmaning Toshkent viloyati boʻlimi masʼul kotibi; 1996–2009-yillarda Oʻzbekiston Yozuvchilar uyushmasi raisi va bir vaqtning oʻzida Oʻzbekiston Respublikasi Mualliflik huquqini himoya qilish davlat agentligi raisi lavozimlarida faoliyat yuritgan. 2009-yildan umrining oxirigacha Oʻzbekiston Yozuvchilar uyushmasi faxriy raisi lavozimini egallagan. Abdulla Oripov 1995-yilda Oʻzbekiston Oliy Majlisi deputatligiga saylangan. 2005-yilda Senat aʼzosi etib tayinlangan. Abdulla Oripov 2016-yilning 5-oktyabrida AQShning Texas shtatida vafot etgan.