KOʻZIDIN BOSHDA HAVODUR

Bobur ijodiy merosi bilan tanish kitobxon uning ohanrabosi, goʻzalligini yaxshi his qiladi. Darhaqiqat, Zahiriddin Muhammad Bobur shoh va shoir oʻlaroq «toleʼ yoʻqi», yaʼni baxtsizligidan faryod cheksa-da, oʻsha iztiroblari uning goʻzal sheʼriyatiga asos boʻldi. Temuriylar saltanatining munosib vakili boʻlgan, otasining vafotidan soʻng juda erta yoshida taxt vorisi qilib tayinlangan Boburning keyingi hayoti tahlilkalar bilan oʻtdi, atrofida roʻy berayotgan malomatlar uni nihoyatda toliqtirdi. Vatanidan mosuvo boʻlgan, lekin undan umidini uzolmagan shoir hasratlari, koʻnglining nidolari gʻazallariga koʻchdi. Eʼtiboringizga havola etilayotgan mazkur toʻplamga ham biz Zahiriddin Muhammad Bobur koʻngil mulkining goʻzal namuna-larini jamladik. Kitob mutolaasi dilingizga manzur boʻlishiga ishonamiz.