lablaring ISMIMNI AYTSIN

Samodagi million million sayyora aro inson zarraday gap. Ammo, Xudo mehribon, inson ongi butun koinotni o'z ichiga sig'diradi. Tarix oldida inson umri bir lahzaday gap. Ammo, Xudo mehribon, inson ongida million yillik tarix bir lahzada namoyon bo'ladi. Inson, Xudo yaratgan buyuk mo''jizadir. Ushbu kitobda inson ongi kashfiyotlari hikoya qilinadi. Kitob qahramoni goh telba, goh donishmand, goh oshiq, goh hayotdan bezgan, goh ko'ngil mulkiga safar qilgan hazrati insondir. Muhammad Ismoil ularning hayotini qalb qoni bilan yozgan. Shuning uchun ba'zi hikoyalari millionlar tomonidan o'qilsa, ba'zilari Muhammad Ismoilning o'zi uchungina yozilganday tuyuladi. Muhammad Ismoil asarlarining o'z o'quvchisi, o'z muxlisi bor. Ushbu kitobni o'sha aziz insonlarga tuhfa tariqasida nashr etdik. O'qing, huzurlaning, inson qalbiga sayr qiling, inson qalbining kashfiyotlariga oshno bo'ling! Go'zal adabiy guldasta sizga muntazir!