MENING DOGʻISTONIM

Til, millat, xalq, qadriyat, Vatan mehri, davr ruhi, sevgi sehri, haqiqat va yolgʻon, yaxshilik va yomonlik, tinchlik va urush mavzulari hassosona yoritilgan «Mening Dogʻistonim»day asar jahon adabiyotida kam topiladi. Ayniqsa, asar mazmun-mohiyatiga singib ketgan shoirning dilbar sheʼrlari, purmaʼno hikmat-hikoyatlari, oʻzi koʻrgan ibratli voqealar haqidagi yodnomalari oʻquvchilarda oʻchmas taassurot qoldiradi. 1971-yilda dunyo yuzini koʻrgan bu asar oʻtgan yarim asr davomida yuzdan ortiq tillarga tarjima qilindi, millionlab nusxada chop etildi. Biroq hamon savdo rastalarida kam topiladigan noyob kitoblar qatorida tilga olinadi. Mazkur kitobning ona tilimizda koʻp nusxada chop etilishi shoirning qadrdon muxlislari qoʻllariga bir tuhfaday yetib borish imkonini beradi. Ishonchimiz komil, dunyoga mashhur bu kitob oʻzining yangi-yangi muxlislarini topadi va ularning ham sevimli maʼnaviy mulkiga aylanadi.