Mening Dogʻistonim

Avar xalqining mashhur shoiri Rasul Hamzatov(1923–2003)ning «Mening Dogʻistonim» asari Vatan tuygʻusi, millat ravnaqi, til madaniyati, urf-odatlar davomiyligi, hikmat-rivoyatlar boqiyligi va sof muhabbat haqidagi eng ibratli kitoblardan biridir. 1967-yilda bosmadan chiqqan bu kitob tezda jahon xalqlari tillariga oʻgirildi va kitobxonlarning bebaho boyligiga aylandi. Oʻz ijod mahsuli muvaffaqiyatidan ruhlangan shoir «Mening Dogʻistonim» asarining ikkinchi kitobini 1971-yilda adabiyot muxlislariga taqdim etgandi. Isteʼdodli shoir Asror Moʻmin ushbu asarning birinchi kitobini 2008-yilda, ikkinchi kitobini 2011-yilda ona tilimizga toʻliq tarjima qildi. Shoirning komil inson orzusini oʻzida mujassam etgan mazkur asari kitobxonlarni, ayniqsa, yosh avlodni ham milliy, ham umuminsoniy qadriyatlar ruhida tarbiyalashda muhim ahamiyatga ega ekanligini hisobga olib, ikkala kitob yaxlit holda chop qilinmoqda. Yosh kitobxonlarni hisobga olgan holda tarjimonning shoir hayoti va ijodiga bagʻishlangan maqolasi ham kiritildi. Ona tilimizda, toʻliq xolda chiqayotgan bu kitob Rasul Hamzatov muxlislari uchun ajoyib tuhfadir.