MEROS

Insonning qoʻli gul. Uning ziynati ezgu amalida. Yuz yil yashagan baxil odam xotirasi lahzaga yetmas, biroq oʻzidan unumli ish qoldirgan insonning qisqa hayoti ham abadiyatga tengdir. Oʻtgan asrning atoqli yozuvchilaridan boʻlgan Pirimqul Qodirov Yolqinjon siymosida har bir zahmatkash oʻzbek oʻgʻlonining hayot yoʻlini tasvirlaydi. Choʻl-u biyobonlarni, qoʻriq yerlarni bogʻ-u rogʻlarga aylantirish kishidan ulkan jasorat, bukilmas metin-irodani talab etadi. „Meros“ asarini oʻqir ekansiz, zahmatkash ota-bobolarimiz oʻtgan asrda qanday jonkuyarliklar qilganini yaqindan his etasiz. Beixtiyor shunday mehnatkash millat vakili ekanligingizdan qalbingizda gʻurur-iftixor tuyasiz.