OILA — MUQADDAS DARGOH

Oila — muqaddas dargoh. U huquq va vijdon qonunlari asosida qurilib, o‘zining ko‘p asrlik mustahkam va ma’naviy tayanchlariga egadir. Shu bois, bugun yurtimizda oilalar mustahkamligini ta’minlash, ularga har tomonlama ko‘mak berish, xotin-qizlar va voyaga yetmagan farzandlar huquqini himoya qilish masalasiga, shuningdek, oilaviy munosabatlarga oid qonun hujjatlarini yanada takomillashtirishga e’tibor qaratilmoqda. Fuqarolar nikoh va oila munosabatlarini tartibga soluvchi qonun hujjatlarining mazmun-mohiyatini to‘la egallashi, ularga qat’iy rioya qilgan taqdirdagina oila mustahkam bo‘ladi. Shuni ko‘ra, mazkur risolada nikoh va oila masalalariga oid ba’zi huquqiy tushuntirishlar sodda tarzda yoritib berishga harakat qilingan. Risola nikoh qurish istagida bo‘lgan yoshlar, er va xotinlar hamda oila va nikoh huquqi bilan qiziquvchi barcha fuqarolar uchun mo‘ljallangan.