OLTIN ZANGLAMAS

XX asrning oltmishinchi yillaridan boshlab oʻzbek adabiyoti yangi davrga qadam qoʻydi. Bu davrga kelib shaxsga sigʻinish illatlarining qoralanishi adabiyot ahli ijodiga nisbiy erkinlik olib keldi. Ijodkorlarimiz oʻz asarlarida badiiylikka, qahramon ruhiyati asrorlarini haqqoniy tasvirlashga harakat qila boshladilar. Bundan ham muhimi, urushdan keyingi qatagʻon siyosatining qurbonlari boʻlgan ziyolilar, adib va shoirlar ozodlikka chiqdilar. Ularning ijodkorlik maqomi tiklanib, ijod bilan shugʻullanish imkoniyati paydo boʻldi. Ana shunday isteʼdodli adiblarimizdan biri Shuhrat edi. Shuhrat ham koʻplab tutqunlar qatori erkinlikka chiqqach, “Oltin zanglamas”, “Shinelli yillar” asarlarini yaratdi. Qayta mehnat evaziga tayyorlangan “Oltin zanglamas” romani kitobxonlarga adib ijodining mukammal namunasi bilan tanishish imkoniyatini beradi. Mazkur kitob Oʻzbekiston Respublikasi Fanlar akademiyasi Oʻzbek tili, adabiyoti va folklori instituti Ilmiy kengashi yigʻilishining 2020-yil 28-fevraldagi 2-sonli majlisida nashrga tavsiya etilgan.