OʻZBEK TILINING IZOHLI LUGʻATI

Ushbu koʻp jildli "Oʻzbek tilining izohli lugʻati" uning lotin yozuviga asoslangan oʻzbek alifbosida tayyorlangan dastlabki nashri hisoblanadi. Lugʻat hozirgi oʻzbek adabiy tiliida keng isteʼmolda boʻlgan 80 mingdan ortiq soʻz va soʻz birikmalarini, fan, texnika, sanʼat va madaniyat sohalariga oid terminlarni, bir necha shevada qoʻllanadigan soʻzlarni, baʼzi tarixiy va eskirgan atamalarni oʻz ichiga oladi. Lugʻatda berilgan soʻzlarning amalda qoʻllanilishi XX asr hamda XXI asrning dastlabki davri oʻzbek adabiyoti va matbuotidan olingan misollar bilan dalillangan. Lugʻat oʻzbek tilshunosligi va turkiyashunoslik boʻyicha mutaxassislar, tarjimonlar, ommaviy axborot vositalari xodimlari, oliy taʼlim muassasalarining oʻqituvchilari va talabalari, shuningdek, keng oʻquvchilar ommasi uchun moʻljallangan.