QALB BESABRLIGI

«Kitob har qanday bilimning joni va yuragi, har qanday fanning ibtidosidir», deb ta’kidlagan edi Stefan Sveyg. S.Sveyg ayni shu nuqtayi nazarga tayangan holda ijod qilgan mashhur yozuvchilardan hisoblanadi. Ezgulik, insonparvarlik, pokiza va fidoyilarcha ishq-muhabbat tuygʻulari uning asarlarida yuksak mahorat bilan tarannum qilingan. «Qalb besabrligi» romanida kelishgan leytenant Gofmiller bilan boy xonadonning qizi Edit muhabbati tasvirlangan. Yosh leytenantning samimiy lutf va iltifotlari mehrga tashna Editning qalbida rasmana muhabbat chechaklari gullashiga olib keladi. Biroq irodasi zaif yigitning sustkashligi, adib ta’biri bilan aytganda, halokatli mehr-u shafqati Editning koʻngli qolishiga, oqibatda bevaqt nobud boʻlishiga sababchi boʻladi. Gofmiller-chi? Qizning oʻlimi unga qanday ta’sir qiladi? «Hamonki vijdoning yodda tutar ekan, hech qanday gunoh unutilishga mahkum emas», shunday qarorga kelgan gunohkor yigit kechirishga loyiqdir, balki... Ilk bor oʻzbek kitobxoniga taqdim etilayotgan asar aziz oʻquvchilarimiz qalbidan joy oladi, degan umiddamiz.