QAYTA TUGʻILGAN BOLA

Oʻsmirlik — inson hayotining eng murakkab, eng qaltis, eng nozik davridir. Bolalikdan balogʻatga oʻtish bosqichi hisoblanmish bu davrda xarakter shakllanadi, kuchli his-tuygʻu, gʻayrat-shijoat joʻsh uradi; oʻsmir qalb his-hayajonga berilib, mustaqil boʻlishga, oʻz qiyofasini namoyon qilishga intiladi.Qator asarlari bilan oʻquvchilar mehriga sazovor boʻlgan iqtidorli adib Abdusaid Koʻchimovning qoʻlingizdagi kitobiga kiritilgan qissa va hikoyalarning barchasida aynan ana shu goʻzal va sertashvish manzaralar oʻsmirlar ruhiy olamida sodir boʻluvchi rivojlanish jarayonlari badiiy talqin qilinadi.Kitobni oʻqir ekansiz, yuragida kuchli his-tuygʻu, gʻayrat-shijoat joʻsh urayotgan, inja xayollar ogʻushida mustaqil boʻlishga, oʻz soʻzini aytishga intilayotgan ajoyib yigit-qizlarning rang-barang qiyofalari bilan tanishasiz. Yosh qahramonlarning hech qaysisi bir-biriga oʻxshamaydi: biri taʼsirchan, biri sergʻayrat, tashabbuskor, mehribon, biri qoʻrs, biri jizzaki, yana biri sal narsadan ranjuvchi nozik taʼb. Oʻz-oʻzini xiyol anglab, qalbida sevgi-muhabbat hislari mavjlanib boshlayotgan bunday yosh yuraklarning murakkab kechinmalari, oʻzlari-oʻziga sirli qidirishlari; baʼzi birlarining atrofdagilar eʼtiboroni jalb etish, kutilmagan ish bilan kattalarni hayratga solish, hatta oʻz yaqinlarini choʻchitish hisobiga shaxsiy manfaatlarni cheklab, yuzaga kelayotgan har qanday toʻsiqni yengib oʻtish, oʻz maqsadlariga erishish, oʻz orzu-umidlarini roʻyobga chiqarish uchun katta kuch sarflashlari badiiy tasvirlangan. Har-xil nizolar, chorasizlik, yolgʻizlik, oʻzini kamsitganidek his qilish, erkinlikning cheklanishi, kattalar va yoshlarning bir-birini tushunmasligi va oxir-oqibat, oʻz-oʻzining oʻz oilasi, oʻz jamoasidan uzoqlashishi, kamgap boʻlib, oʻzining ichki botiniy dunyosiga tushib qolishi kabi murakkab holatlar ham yuksak mahorat bilan badiiy tahlil qilinadi.