Qimorboz

Fyodor Dostoyevskiy – tom maʼnoda ham rus adabiyotining, ham dunyo adabiyotining zabardast vakili. Uning asarlari oʻzbek kitobxonlari uchun allaqachon sevimliga aylanib ulgurgan. Qaysiki oʻquvchi boʻlsin, kitob doʻkonida Dostoyevskiyning hali mutolaa qilib ulgurmagan asarini koʻrar ekan, uni olmasdan oʻtmaydi. Nega? Sababi oddiy, chunki Dostoyevskiy asarlariga doimo mohir tarjimonlar murojaat qilishgan. «Telba», «Jinoyat va jazo», «Iblislar», «Aka-uka Karamazovlar», «Boqiy erkak» – bularning barchasi Ibrohim Gʻafurov tomonidan tarjima qilingan. Tarjima qilinganda ham shunchaki oʻgirilgan emas, balki aynan Dostoyevskiy tilida, aynan Dostoyevskiy boʻlib, oʻzbek tilida qayta yozilgan. Soʻzsiz, Ibrohim Gʻafurov tarjimalari haqida hech ikkilanmasdan: «Ibrohim Gʻafurov ushbu asarlar tarjimasi jarayonida Dostoyevskiy boʻlib, asarni oʻzbek tilida qayta yozgan», deyishimiz mumkin. Mazkur kitobga kiritilgan har ikkala roman oʻquvchini doimgidek, oʻylatadi. Soʻzlar, iboralar, tasvirlar, sifatlar, holatlar har qanday oʻquvchini hayratga soladi. Kitobxon asarga, yozuvchiga, tarjimonga muhabbat bilan keyingi mutolaani kutadi...