Qora koʻzlar

«Qora koʻzlar» olis qishloq va undagi orqada qolgan xoʻjalik hayotini roman koʻzgusiga solib koʻrsatdi. Asar boshdan-oyoq oddiy, zahmatkash mehnat ahliga, har qanday mushkul vaziyatlarda ham insoniy fazilatlarini saqlab qololgan asl insonlarga chuqur hurmat, hamdardlik ruhi bilan sugʻorilgan. Yozuvchi xuddi oʻsha qora koʻzlar – jafokash kishilar boshiga tushgan kulfatlar uchun chin dildan qaygʻuradi, taqdirini chigallashtirgan hayotiy-ma'naviy omillar ustida teran mushohada yuritadi. Roman voqealari yuz bergan makon – Oydinkoʻl eskicha tushunchalar, qoloq odatlar ta'siri doirasida xiyla keng yoritiladi. Yozuvchi bu romanida maishiy hayot ikir-chikirlarining chuqur bilimdoni ekanini ham oʻquvchi bir qarashda anglaydi.