QULAYOTGAN TOG'LAR

Chingiz Aytmatov hayotining oxirgi yillarida «Qulayotgan togʻlar» («Mangu qayliq») deb atalgan romanini yozdi. Unda bozor iqtisodiga oʻtayotgan, shiddat bilan globallashuv jarayonlariga kirib borayotgan hozirgi dunyoning maʼnaviy-iqtisodiy muammolarini Qirgʻiziston, Markaziy Osiyo voqeligi, odamlar taqdiri, turmushi, ongida roʻy berayotgan keskin, ogʻriqli oʻzgarishlarga chambarchas holda yoritdi. Tabiat, jamiyat, inson taqdirida yuz berayotgan rang-barang hodisalarni butun fojialari bilan birga yaxlit tasvirladi. Asar buyuk adib va donishmandning avlodlarga soʻnggi vasiyatiday oʻqiladi. Zullisonayn adib bu romanini rus tilida yozdi. U 2007-yilda Peterburgda nashr etildi. Aynan oʻsha nashr asosida oʻzbek tiliga tarjima qilindi.