QUTLUGʻ QON

«Qutlugʻ qon» romani til va badiiy mahorat jihatdan diqqatga sazovor. Asarda adib obraz yaratishda psixologik tahlil san’atidan, xalq tili boyliklaridan ustalik bilan foydalangan. Obraz xarakterini, personaj tilini tabiiy va jonli qilib tasvirlagan. Shunga koʻra romandagi har bir obrazning oʻz ichki va tashqi dunyosi bor, oʻz xarakter va individual tili bor. Masalan, Abdushukur tilidan ishlatilgan «gʻolib boʻlsam», «kaminaning gʻoyaviy hayoti», «e voh, zavoli Turkiston», «milliy sarmoya», «oʻz boylarimiz – musulmon boylarimiz» singari soʻz va iboralar individual tus bergan. Asar haqida fikr yuritgan olim Homil Yoqubov shunday degan edi: “Badiiy asarda personaj nutqi singari muallif nutqi ham aniq va obrazli boʻlishi, milliy tarovat bilan bezangan, davr ruhi bilan sugʻorilgan boʻlishi shart. Bu jihatdan romanning tili ibratlidir”.