SHIROQ

Chunakam vatan himoyachisi boʻlish uchun askarlar nafaqat harbiy sir-sinoatlarni egallashi, shuningdek, maʼnan barkamol, ruhan quvvatli boʻlishlari darkor. Bu borada, shubhasiz, badiiy adabiyotning oʻrni, xizmati beqiyosdir. Shu bois Oʻzbekiston Yozuvchilar uyushmasi tomonidan “Mard askarga sovgʻa” ruknida ixcham kitoblar chop etish yoʻlga qoʻyildi. Ushbu kitobchaga kiritilgan asarlarni oʻqish chogʻida askarlarimiz vatanparvarlik, jasorat, matonat, fidoyilik, or-nomus singari yuksak insoniy fazilatlarning qadr-qimmatini, ahamiyatini yanada teranroq tushunadilar, deb oʻylaymiz. Mazkur moʻjaz kitob mard askarlarning doimiy sirdoshiga aylanadi, ularning choʻntagidan ham, yuragidan ham mustahkam joy egallaydi, deb ishonamiz.