SINCHALAK

Buyuk so'z ustasi Abdulla Qahhorning ushbu asarini — “Sinchalak” qissasini o'qir ekansiz, adibning so'z tanlash mahoratiga yana bir bor qoyil qolasiz. Adib hech qachon biror bir jumlani ikki marta takrorlamaydi — jumla jozibasini buzmaydi. Ushbu asarning bosh qahramonlari Arslonbek Qalandarov va Saida Aliyevalar obraziga boqar ekansiz, ayni vaqtda ham hayotda shular kabi insonlar borligiga guvoh bo'lasiz. “Sinchalak” asaridagi oddiy, aqlli, shijoatkor Saida, ya'ni “Sinchalakxon”ning jasurligiga tan bermasdan ilojingiz yo'q. Qissada turli-tuman, lekin har biri o'ziga xos, fe'li, tabiati, fikrlash tarzi, so'zlash yo'sini bilan farqlanib turuvchi obrazlar tizimi mavjud. Yozuvchi ularning obrazlarini eng mayda detallarigacha mohirlik bilan chizganki, bizularni aynan ko'rgandek bo'lamiz. Qissada yozuvchi Saida va Qalandarovlar obraziga katta mas'uliyat yuklagan. Aytish mumkinki, Abdulla Qahhor o'z o'quvchisiga aytmoqchi bo'lgan ko'p gaplarni Saida va Qalandarov obrazlarining gap-so'zlari, tabiati, xatti-harakatlari orqali ochib bergan.