«Telba» ayol muhabbati

«...oʻqigan kitobimiz bosh suyagimizga urilgan zarba kabi bizni larzaga keltirmasa, nega uni oʻqishimiz kerak?!» Bir qancha detektiv va sarguzasht qissalar, hikoyalar muallifi Zulayho Masharipovaning qalblarni larzaga soluvchi ushbu kitobini oʻqir ekanmiz, beixtiyor F.Kafkaning yuqoridagi soʻzlarini yodga olamiz. Tom maʼnoda kitobdagi qissa va hikoyalar kitobxonni Vatanga, ota-onaga, jigarlariga, atrofdagilariga boʻlgan mehr-oqibati haqida jiddiy oʻylab koʻrishga majbur etadi. Shu bilan birga, asr vabosi – giyohvandlikning oʻlim bilan tugaydigan oqibatlari, «qora dori» oldi-sotdisidan jabr koʻrayotgan begunoh insonlar hayoti, jinoyatchilikka qarshi kurashdagi huquq-targʻibot idoralari xodimlarining mashaqqatli mehnatlari koʻz oldimizda namoyon boʻladi.