TOMCHISINI QIZGʻONMAYDI UMMONI BORLAR

Biz koʻpincha yonimizdagi isteʼdodlarga beparvo boʻlamiz yoki bepisand qaraymiz. Oʻsha odam xuddi oʻzimizga oʻxshagan oddiy odamdek tuyulaveradi. Uning ongu shuurida nimalar kechayotganini va ijod toʻlqinlarining kuch-qudratini, ming afsuski, asrlar oʻtgandan keyingina anglaymiz. Hamma davrlarda ham ijodkor haqida davrdoshlari tomonidan xolis fikrlar aytilmagan... Ammo... Ammo koʻnglingizdagi ushbu kitob zamondosh shoiramiz FARIDA AFROʻZning ijodi haqidadir. Quvonarlisi shundaki, akademik adabiyotshunoslardan tortib, to oddiy muxlislargacha boʻlgan insonlarning shoira ijodi haqidagi fikrlari oʻta xolisdir. Ularning talqin, taqriz, ehtirom va eʼtiroflari sizni ham samimiylik ogʻushiga olib kiradi.